Ullut erfalasulertarfissat pillugit Namminersornerullutik Oqartussat nalunaarutaat nr. 15, 16. maj 2002-meersoq.

 

Kalaallit Nunaata erfalasua pillugu Inatsisartut inatsisaat nr. 6-imi 11. juni 1985-imeersumi § 2 naapertorlugu makku aalajangersarneqarput:

 

§1. Ullut erfalasulerfissat, kalaallit erfalasuata pisortat illuutaannit tamanit amuneqartarfissai tassaapput:

01.01.	Ukiortaaq
06.01.	Kunngit Pingasut ulluat
	Tallimanngorneq Tannaartoq
	Poorski
09.04.	Danmarkip tigusaaffia
16.04.	Ataqqinartorsuup Dr. Margrethep inuuia
29.04.	Kunngikkormiutut ataqqinassusillip Prinsesse Benediktep inuuia
01.05.	Namminersornerulernerup ullua/Sulisartut ulluat
05.05.	Danmarkip aniguisitaaffia
	Qilaliarfik
	Piinsi
26.05.	Kunngikkormiutut ataqqinassusillip Kunngissap Frederiup inuuia
05.06.	Inatsisitaarfik
07.06.	Kunngikkormiutut ataqqinassusillip Prins Joachimip inuuia
11.06.	Kunngikkormiutut ataqqinassusillip Prins Henriup inuuia
15.06.	Valdemarip ullua/Sønderjyllandip Danmarkimut ataleqqiffia
21.06.	Kalaallit inuiattut ulluat
30.06.	Kunngikkormiutut ataqqinassusillip Prinsesse Alexandrap inuuia
03.07.	Hans Egedep ullua
24.10.	Naalagaaffiit Peqatigiit ulluat
24.12.	Juulliaraq
25.12.	Juullerujussuaq

§ 2. Erfalasoq kingusinnerpaamik nal. 09.00 amuneqartassaaq siusinnerpaamillu peerneqartassalluni nal. 17.00 kingusinnerpaamillu nal. 20.00. Tallimanngornermi Tannaartumi erfalasoq qiteqqusimasassaaq, Danmarkip tigusaaffiani ullormi 9. apriilimi erfalasoq ullup qeqqata tungaanut qiteqqusimasassaaq, ullup qeqqanut apissillugu amuneqartassalluni. Ulluni erfalasoqarfissani allani tamani erfalasoq apissisimasassaaq. Ulloq erfalasoqarfissaq alla Tallimanngornermik Tannaartumik naleruippat erfalasoq ulloq naallugu qiteqqusimasassaaq.

§ 3. Nalunaarut manna ulluni allani erfalasulernissamik ajornartitsinngilaq, - soorlu ilagiit nalliuttuini – ullorsiorfinnilu suniluunniit.

§ 4. Nalunaarut manna 1. juni 2002-mi atuutilerpoq.
Stk. 2. Tamatumunnga peqatigitillugu Namminersornerullutik Oqartussat Aappalaartulertarnissaq pillugu kaajallaasitaat 1. januar 1988-imeersoq kiisalu Namminersornerullutik Oqartussat nalunaarutaat nr. 7, 11. april 1997-imeersoq atorunnaarsinneqarput.

Namminersornerullutik Oqartussat ulloq 16. maj 2002

Jonathan Motzfeldt

/

Sólja í Ólavsstovu